ҚР Көлік министрлігі биыл еліміздің аумағында салынатын жолдарды атады.
— Мемлекет басшысының Ұлттық құрылтайда берген тапсырмасына сәйкес, 2024 жылы 12 мың шақырым тасжолды жөндеу және қайта жаңарту жұмыстарымен қамту жоспарланған. Бүгінгі күні 7,2 мың шақырымға жуық жолдардағы жұмыстар аяқталды. Оның ішінде құрылыс және қайта жаңарту бойынша 3,1 мың шақырым (2,2 мың шақырымы аяқталды), республикалық желіні күрделі және орташа жөндеу бойынша 4,9 мың шақырым (1,5 мың шақырымы аяқталды), жергілікті желіні жөндеу бойынша 4,3 мың шақырым (3,6 мың шақырымы аяқталды) қамтылды, — делінген министрліктің Kazinform агенттігіне берген жауабында.
Қазіргі кезде автожолдардың жалпы ұзындығы 95 мың шақырымды құрайды, оның 25 мың шақырымы республикалық желіге қарасты болса, қалған 70 мың шақырымы жергілікті желіге жатады. Жергілікті желіні дамыту бойынша 2029 жылға дейін кемінде 14 мың шақырым жергілікті жолдарды қайта жаңарту және жөндеу жұмыстары атқарылады.
— 2025-2030 жылдар аралығында жалпы ұзындығы 4,7 мың шақырымды құрайтын (3,7 мың шақырым – I санат, 1 мың шақырым – II санат) жаңа жобаларды кезең-кезеңімен іске асыруды бастау жоспарланған, — деп аталып өткен ведомство ақпаратында.
Атап айтқанда, 2025 жылы «Қызылорда – Жезқазған» (208 шқ), «Ақтөбе – Ұлғайсын» (234 шқ), «Қарағанды – Жезқазған» (572 шқ), «Сарыағаш қаласын айналып өту» (102 шқ), «Қызылорда қаласын айналып өту» (20 шқ), «Қызылорда – Сексеуіл» (470 шқ), «Атырау – Доссор» (86 шқ), «Рудный қаласын айналып өту» (16,9 шқ), «Жаңаөзен – Кендірлі» (156 шқ), «Петропавл қаласын айналып өту» (8 шқ), «Түркістан қаласын айналып өту» (29,6 шқ), «Астана – Қостанай – РФ шекарасы» (830 шқ), «Шымкент қаласын айналып өту» (48 шқ), «Атырау – Орал» (орташа жөндеу) (516 шқ), «Атырау – Чапай» (136 шқ), «Алматы – Талғар – Бәйдібек Би» (68 шқ), «Алматы – Үшқоңыр» (48 шқ), «Бейнеу – Сексеуіл» (736 шқ), «Орал көпірі» (6,5 шқ) сынды жобаларды іске асыруды бастау қарастырылған.
Бұл тұрғыда перспективалы жобаларды жүзеге асыру үшін қазір инвестиция тарту мәселелері пысықталып жатыр.
