Шымкент қаласының мамандандырылған ауданаралық экономиқалық сотында заңсыз салынған құрылыс нысанын бұзу туралы азаматтық іс қаралды.
— Тұран ауданына қарасты «Абай» саябағы аумағында орналасқан, жалпы алаңы 32,3806 га жер телімі талап қоюшының теңгеріміне берілген. Осы саябақ аумағында серіктестікке тиесілі екі қабатты құрылыс нысаны бар. Алайда, серіктестік «Қазақстан Республикасындағы сәулет, қала құрылысы және құрылыс қызметі туралы» Заңының 68-бабының 1-тармағына сәйкес құрылыс нысандарын жүргізу кезiнде талаптарды сақтамай құрылыс жүргізген,- делінген Шымкент қалалық сотының баспасөз қызметі ұсынған ақпаратта.
Бұның алдында жергілікті атқарушы орган жауапкер серіктестікке құрылыс нысандарын бұзу жолымен жер учаскесін босатуды міндеттеп, тараптар бітімгершілік келісімге келген. Онда орналасқан барлық құрылыс нысандары мемлекетке өтеусіз берілуі тиіс болған.
— Жауапкер серіктестік болса, саябақтың жоспарына сәйкес тек балалардың ойын- сауық кешені ретінде пайдалануға, уәкілетті органдардың арнайы рұқсаттарын алмай алкоголь өнімін сатуға және қандай да бір өзге тәсілмен өткізуге, оны өндіруге, өткізуге және сақтамауға және алкоголь өнімдерін шығаратын шағын зауытының жабдықтарын бөлшектеуге міндеттенген. Алайда, жауапкер өзіне алған міндеттемелерді толығымен орындамаған,- делінген сот ақпаратында.
Сот, жоғарыда көрсетілгендердің негізінде, талап қою заңды және негізді деген қорытындыға келді. Соттың шешімімен жауапкер серіктестікке тиесілі құрылыс нысандарды өз есебінен мәжбүрлеп бұзылуға жатады деп таныды. Шешім заңды күшіне енген жоқ.
