Үш жүздің басын қосқан киелі Ордабасы ауданында 14 наурыз – Амал мерекесіне орай зиялы қауым өкілдері, ел ағалары мен ардақты аналары бас қосып, дәстүрлі мерекені ерекше сән-салтанатпен атап өтті.
Темірландағы «Шәмші» аллеясында өткен іс-шараға қос өңірдің – Түркістан облысы мен Шымкент қаласының ардагерлері мен батагөй ақсақалдары, зиялы қауым өкілдері мен өнерпаздары қатысты.
Жиналған жұртшылықты екі өңірдің ардагерлер кеңесінің төрағалары Жеңісбек Мәуленқұлов пен Кенжехан Төлебаев мерекемен құттықтап, жылы лебіздерін білдірді. Наурыздың 10 күн бойы игі істермен өрнектелетінін айтып, «Ұлыс оң болсын!» деген тілектерін жеткізді. Сонымен бірге Ордабасы ауданының әкімі Азат Оралбаев Амал күнінің мәніне тоқталып, көпшілікті құттықтады.
Түркістан облысында 2 154,3 мың адам тұрады, оның 1055,6 мыңы немесе 49%-ы әйелдер. Республика бойынша барлық көп балалы аналардың төрттен бір бөлігі немесе 185 349-ы Түркістан облысының тұрғындары. Сонымен қатар бүгінгі күні облыста 7278 отбасы атаулы әлеуметтік көмек алады.
15 наурызда «Наурызнама» онкүндігі аясында «Қайырымдылық» күні аталып өтті. Өңірдегі барлық аудан, қалада қолдауға мұқтаж көп балалы аналарға, аз қамтылған отбасыларға, мүгедектігі бар азаматтарға көмек берілді.
Аталған іс-шара барысында облыс бойынша барлығы 800 адамға 5635,0 мың теңгенің заттай және қаржылай көмегі көрсетілді.
16 наурыз – «Шаңырақ» күнінде облыс орталығында Түркістан музыкалық драма театры жанынан құрылған «Түркістан» ансамблінің тұсаукесер концерті өтті. Өнерсүйер қауымның зор ықыласына бөленген гала-концертке облыс әкімі Нұралхан Көшеров арнайы қатысып, шығармашылық ұжымға сәттілік тіледі.
«Түркістан» ансамблі ұлттық мәдениетімізді сақтап, оны әлемге таныту жолында үлкен міндеттерді атқаруға дайын. Жаңа ұжым Түркістан қаласының мәдени өмірін байытып, елдің музыкалық саласында жаңа кезеңнің бастамасын қалау мақсатын көздейді.
Кештің басты ерекшелігі – ұлттық дәстүрлер мен заманауи шығармашылықтың үйлесімі. Жаңа ансамбль қазақтың халық әндері мен күйлерін, сондай-ақ танымал композиторлардың шығармаларын орындап, көрермендерге ерекше рухани ләззат сыйлады.
17 наурыз – Мәдениет және ұлттық салт-дәстүр күні. Қазақ мәдениеті – қазіргі қоғамды ортақ құндылықтар аясына топтастырып, халқымызды біріктіретін діңгегіміз.
Сол себепті 17 наурыздың тақырыптық мазмұны мәдениетті, өнерді және ұлттық құндылықтарды насихаттауға арналған. Бұл ата-бабаларымыздың рухани және мәдени тыныс-тіршілігін толық сезінуге мүмкіндік береді.
