Өскеменде белгілі спортшы, жекпе-жек шебері Эльер Юнусметов көз жұмды. Кеше Өскеменде тұрғын үйлердің бірінің кіреберісінде ер адамның оқ жарақатынан қайтыс болғаны туралы ақпарат тараған болатын.
«Криминальный Казахстан» телеграм-каналының мәліметінше, қаза болған ер адам — белгілі спортшы, халықаралық деңгейдегі ММА шебері Эльер Юнусметов екені анықталды. Эльер кикбоксинг, самбо, бокс, қоян-қолтық ұрыс, тай боксынан өткен аудан, облыс, республикалық және халықаралық чемпионаттардың чемпионы атанған.
Аталған қылмысты жасады деген күдікпен 26 жастағы А.Т есімді азамат ұсталған. Алдын ала болжам бойынша ер адам 23 жастағы келіншегін Юнусметовтен қызғанып кеткендіктен, осы қылмысқа барған көрінеді.
Yk-news.kz сайты хабарлағандай, Эльер Юнусметов 1990 жылы ШҚО, Катон-Қарағай ауданы, Үлкен Нарын ауылында дүниеге келген. 5 жасынан бастап спортпен айналысқан. Ең алғашқы бапкері — әкесі болған. Спорттық мансабында көп жетістікке жеткен.
Кейінгі уақытта спортшы «Барыс QTT» бразилиялық клубтың сапында джиу-джитсу және грэпплингпен айналысып, жаттығып жүрген. Айта кетейік, қайғылы оқиғаға қатысты «кісі өлтіру» (ҚР ҚК 99) бабы бойынша сотқа дейінгі тергеу басталды.
Пікір жазу
📧 sozbesoz@gmail.com
77054341516
